Nëpunësi i sindikatës italiane letër të hapur Ramës: Korrupsioni është rritur, largohuni

Spiro Prebibaj, nëpunës i një sindikate në Itali dhe përfaqësues i punëtorëve të sektorit të ndërtimit, i ka drejtuar një letër të hapur kryeministrit Edi Rama, ku shpreh kritika të forta ndaj qeverisjes dhe i kërkon dorëheqjen.

Në letrën e tij, Prebibaj thotë se prej afro 20 vitesh merret me mbrojtjen e të drejtave të punëtorëve shqiptarë dhe të huaj në Itali, ndërsa thekson se vitet e fundit është rritur numri i shqiptarëve që kërkojnë të largohen nga vendi për një jetë më të mirë.

Sipas tij, qytetarët kanë humbur besimin te qeveria dhe Shqipëria ndodhet në një situatë të rëndë politike dhe sociale.

"Jemi në një pikë kritike, duke jetuar në një regjim që duket më i keq se komunizmi, pavarësisht se shpallet si demokraci", shkruan ai.

Prebibaj shprehet se ka marrë pjesë në protestat e zhvilluara kundër qeverisë, duke i cilësuar ato si një shprehje të qytetarisë dhe të kërkesës për ndryshim. Ai kritikon edhe premtimet e pambajtura të qeverisë për shëndetësinë, luftën kundër korrupsionit dhe përmirësimin e shërbimeve publike.

Në letrën e tij, ai ndalet edhe te ndërhyrjet në Lumin e Nikaj-Mërturit, të cilat i konsideron të papranueshme, duke pretenduar se janë kryer pa komunikim me banorët dhe duke dëmtuar një pasuri natyrore të zonës.

Prebibaj përmend gjithashtu deklaratat e mëparshme të ish-presidentit Ilir Meta dhe të deputetit Eduard Shalsi për nevojën e investimeve në Nikaj-Mërtur, ndërsa akuzon këtë të fundit se nuk i ka mbajtur premtimet dhe se, sipas tij, interesi ka qenë shfrytëzimi i lumit.

LETËR E HAPUR PËR KRYEMINISTRIN E SHQIPËRISË, Z. EDI RAMA

Shkëlqesia Juaj,
Zotit Kryeministër Edi Rama,
Tiranë, Shqipëri

Unë quhem Spiro Prebibaj dhe jam një nëpunës i sindikatës në Itali, duke përfaqësuar të gjithë punëtorët e sektorit të ndërtimit. Prej gati 20 vitesh merrem me mbrojtjen e të drejtave të punëtorëve, shqiptarë dhe të huaj.
Në vitet e fundit kemi parë një rritje të numrit të qytetarëve shqiptarë që dëshirojnë të transferohen në Itali, në kërkim të një klime më të mirë për punë dhe jetë. Fatkeqësisht, në Shqipëri situata është bërë e paqartë.

Qytetarët shqiptarë kanë humbur besimin te qeveria, madje edhe te ata që e kanë votuar. Jemi në një pikë kritike, duke jetuar në një regjim që duket më i keq se komunizmi, pavarësisht se shpallet si demokraci.

Javën e kaluar kam marrë pjesë në një protestë me shumë qytetarë, të gjithë të bashkuar në kërkesën për dorëheqjen tuaj. Ne pamë një qytetari të madhe dhe përgjegjshmëri nga protestuesit, të cilët kërkonin një ndryshim rrënjësor.

Pavarësisht pretendimeve tuaja se keni marrë mbi 800,000 vota, kujtoj se edhe regjimi komunist gëzonte një mbështetje të tillë, por populli shqiptar ka treguar se ka fuqinë për të ndryshuar. Është koha për të kthyer faqen.

Në mandatin tuaj të katërt keni vazhduar të mashtroni shqiptarët me premtime për shëndetësi falas dhe efikase, ujë dhe energji 24 orë, si edhe luftë kundër korrupsionit. Megjithatë, korrupsioni është rritur dhe qytetarët janë të lodhur nga padrejtësitë.

Dua gjithashtu të theksoj se shqiptarët nuk janë kundër Izraelit apo Shteteve të Bashkuara, por janë të bashkuar kundër jush, Edi Rama. Protestat shtrihen në të gjithë botën, ndërsa qytetarët kërkojnë identitetin dhe dinjitetin e tyre.

Veprimet e fundit të qeverisë, si devijimi i Lumit të Nikaj-Mërturit pa asnjë komunikim, janë të papranueshme. Shqiptarët kanë të drejtën e shenjtë për të mbrojtur tokën dhe identitetin e tyre.

Para disa vitesh edhe ish-Presidenti Ilir Meta doli në Nikaj-Mërtur dhe në Curraj të Epërm, duke thënë: si është e mundur që është braktisur ky vend kaq i bukur dhe si nuk është bërë asnjë investim në gjithë këto vite?

Të njëjtën gjë e ka bërë edhe z. Eduard Shalsi, i cili para një viti doli në Curraj të Epërm duke thënë se një vend i tillë meriton investime, sidomos në rrugën për në Curraj. Por ai paska qenë për interesat e veta, që të marrin lumin dhe të shkatërrojnë mjedisin natyror kaq të mahnitshëm.

Po ashtu, i bëj thirrje Ambasadorit Italian në Tiranë, Shkëlqesisë së Tij, Alessandro De Pedys, që të qëndrojë në anën e të drejtave dhe të të dobëtve. Pas më shumë se 28 ditësh protestash, presim një zë të tij në mbrojtje të qytetarëve shqiptarë dhe italianë në Shqipëri.

Nëse nuk dëshironi që një tjetër gjysmë milioni shqiptarë të transferohen në Itali, ju lutem bëni pjesën tuaj. I bëj një thirrje të fortë edhe sindikatës shqiptare dhe mediave, që të bëhen të dëgjuara dhe të mbrojnë të drejtat e qytetarëve.

Mjaft më me mbrojtjen e një qeverie që tashmë ka rënë; është vetëm çështje kohe.

Rama, largohu!

Rroftë Shqipëria!
Rrofshin shqiptarët!

Me respekt,
Spiro Prebibaj