Këlliçi denoncon luksin në Kryeministri: Qindra mijë euro për zyra ndërsa qytetarët protestojnë

Deputeti i Partisë Demokratike, Belind Këlliçi ka denoncuar përmes një postimi në rrjetet sociale punimet që, po kryhen në ambientet e Kryeministrisë, duke i cilësuar ato si luksoze dhe të kushtueshme.

Në postimin e tij, Këlliçi thotë se ndërsa qytetarët vijojnë protestat kundër korrupsionit dhe arrogancës së qeverisë, kryeministri Edi Rama po shpenzon fonde për ndërhyrje në zyrën e tij.

Sipas tij, punimet në hollin e Kryeministrisë janë tejet të shtrenjta dhe kapin vlera qindra mijë euro, ndërsa përmend gjithashtu edhe një projekt të mëparshëm në ambientet qeveritare që ka kushtuar miliona euro.

Postimi:

Populli në shesh kundër korrupsionit dhe arrogancës, ndërkohë Edi Rama shton luksin në zyrën e tij

Në mes të sharjeve e damkosjeve për të rinjtë që kanë mbushur sheshet, herën e fundit Edi Rama tha se disa kërkesa po i dëgjonte e po i mbante shënim. Arsyeja kryesore që janë ngritur njerëzit në protestë është korrupsioni dhe arroganca, trajtimi i buxhetit dhe i pasurive të vendit si të ishin pronë private e Edi Ramës.

Arsyeja kryesore pse sheshet janë në revoltë është varfëria e pamundësia e shumicës së njerëzve përballë luksit të shfrenuar të qeveritarëve.

Dhe ja si i përgjigjet Edi Rama kësaj kërkese. Punimet në foto po bëhen në hollin e Kryeministrisë dhe vlerësohet se janë tejet të shtrenjta. Kushtojnë qindra mijë euro. Ndërkohë që protestohet prej 36 ditësh para zyrës së tij, autokrati fokusin e ka tek luksi personal!

Shihni pra diferencën mes fjalëve dhe veprave të një autokrati të korruptuar.

Pasi me taksat e qytetarëve ndërtoi një kopsht privat që kushtoi mbi 4 milionë euro, për t'u çlodhur, tani Edi Rama po shpenzon dhe ca qindra mijë euro të tjera për hollin e zyrës së tij… Çmenduri!!!

Ai nuk ka asnjë lidhje me qytetarët e shqetësimet e tyre të përditshme. Ai nuk do t’ia dijë se në spital mungojnë shtretërit dhe ilaçet.

Ai është i përqendruar vetëm tek privilegjet dhe shpenzimet faraonike.

Edi Rama nuk meriton të qëndrojë më asnjë ditë në detyrë. Ai po përbuz shqiptarët në çdo moment të ekzistencës si Kryeministër.