Protestuan kundër qeverisë, arrestohen 19 persona, procedohen penalisht 12 të tjerë

Një ditë pas protestës së zhvilluar para Kuvendit, Policia e Tiranës ka njoftuar arrestimin e 19 personave dhe procedimin penal në gjendje të lirë të 12 të tjerëve.

Tubimi i së enjtes u shoqërua me tensione dhe përplasje mes protestuesve dhe forcave të rendit, ku policia përdori gaz lotsjellës, spraj dhe ujë për të shpërndarë turmën.

Sipas Policisë, personat e arrestuar dyshohet se kanë kundërshtuar efektivët, i kanë goditur me sende të forta, kanë dëmtuar një automjet të Policisë dhe kanë sulmuar deputetë gjatë protestës.

Në mesin e të arrestuarve ndodhet edhe shtetasi me inicialet A. Ll., 35 vjeç, i cili akuzohet se ka goditur një gazetar gjatë tubimit.

Po ashtu, 12 persona të tjerë janë proceduar penalisht për veprime të ndryshme të kundërligjshme, ndërsa hetimet vijojnë për identifikimin e gjashtë personave të tjerë, të cilët, sipas Policisë, janë filmuar duke ushtruar dhunë.

Njoftimi:

Kundërshtuan dhe goditën me sende të forta punonjësit e Policisë, dëmtuan një automjet policie si dhe sulmuan deputetët e Kuvendit të Shqipërisë gjatë tubimit të zhvilluar dje, arrestohen 19 shtetas.

Procedohen penalisht 12 shtetas.

Vijon puna për identifikimin dhe të 6 shtetasve të tjerë që janë dokumentuar me pamje filmike për veprime të dhunshme.

Gjatë tubimit u dëmtuan 15 punonjës policie dhe një automjet policie.

Në vijim të veprimeve procedurale të kryera nga strukturat e Drejtorisë Vendore të Policisë Tiranë, në lidhje me tubimin e zhvilluar dje pranë Parlamentit, u bë arrestimi në flagrancë i shtetasve:

-B. K., 35 vjeç; A. E., 24 vjeç; G. P., 36 vjeç; D. B., 32 vjeç; K. P., 46 vjeç; R. D., 30 vjeç; A. Y., 40 vjeç; N. Q., 43 vjeç; Y. Sh., 52 vjeç; E. Gj., 39 vjeç; F. B., 56 vjeç; R. P., 35 vjeç; A. T., 34 vjeç; A. N., 35 vjeç; E. B., 45 vjeç; A. H., 35 vjeç; E. G., 23 vjeç, E. B., 20 vjeç.

Si dhe shtetasi A. Ll., 35 vjeç, pasi ka goditur një gazetar.

Gjithashtu, u proceduan penalisht në gjendje të lirë shtetasit: F. D., 63 vjeç; Sh. B., 33 vjeç; V. D., 29 vjeç; E. Gj., 38 vjeç; T. T., 43 vjeç; E. A., 31 vjeç; G. S., 20 vjeç; R. D., 30 vjeç; A. M., 39 vjeç; M. J., 47 vjeç, A. G., 47 vjeç dhe A. K., 22 vjeçe.

Grupi hetimor vijon punën për identifikimin e shtetasve të tjerë që mund të kenë kryer veprime të kundërligjshme gjatë tubimit të zhvilluar dje.

Materialet procedurale i janë referuar Prokurorisë së Tiranës, për veprat penale “Shkatërrim prone”, “Kundërshtim i punonjësit të policisë”, “Goditje për shkak të detyrës”, “Prishje e rendit dhe e qetësisë publike”, “Organizim dhe pjesëmarrje në grumbullime dhe manifestime të paligjshme”, “Mosbindje ndaj urdhrit të ligjshëm të punonjësit të policisë” dhe “Pengim i qarkullimit të mjeteve të transportit”.