Flash News

Dhuna ndaj protestuesve, Komiteti Shqiptar i Helsinkit: Policia përdori forcë joproporcionale, kërkojmë hetim

PD çon në Kushtetuese rrëzimin e komisioneve hetimore për AKSHI-n dhe rrugët

Zvicra siguron kualifikimin në fazën e 1/8-ave të Kupës së Botës 2026

Sërish kërkesë për arrestimin e Ballukut? Braho: Dy gjëra mund t’ju them...

Këmbimi valutor 3 korrik/ Me sa blihen e shiten dollari dhe euro

E-TJERA

Nga projekti fantazmë i inicineratorit të Tiranës u zhdukën 99 milionë euro

Politiko 3 Korrik 2026, 15:13

Nga projekti fantazmë i inicineratorit të Tiranës u zhdukën

Gjashtë vjet pas nisjes së hetimeve, Prokuroria e Posaçme i vuri kapak aferës së incineratorëve duke dërguar në gjykatë fraksionin e dosjes, që lidhet me akuzat e pastrimit të parave, mashtrimit me pasoja të rënda dhe grupit të strukturuar kriminal.

Përmes njoftimit për shtyp, SPAK deklaroi se po dërgonte për gjykim 12 persona me në krye dy biznesmenët në arrati, Mirel Mërtiri dhe Klodian Zoto, për përfitimin e miliona eurove përmes mashtrimit nga kontrata famëkeqe koncesionare e incineratorit të Tiranës, i cili nuk u ndërtua kurrë.

Bashkë me Mërtirin dhe Zoton, nën akuzë për veprat e rënda penale janë edhe Dashamir Ymeraj, administratorët Arjola Kodra dhe Giuseppe Ciaffaglione, Denisa Tollkuçi, Elton Bualli, Ilir Dedja, Renardo Nallbani dhe gazetari Endrit Habilaj. Gjithashtu, për gjykim po dërgohen dy drejtorët e emëruar të kompanisë së regjistruar në Holandë, Integrated Energy BV, Marc Richard Lappat dhe Michael Peter Drujits si dhe kompanitë Integrated Energy B.V SPV dhe Integrated Technology Services,

Sipas Prokurorisë së Posaçme, të pandehurit akuzohen se në bashkëpunim me njëri-tjetrin zhdukën rreth 99 milionë euro të taksapaguesve dhe bizneseve shqiptare gjatë periudhës 2017-2023. Nga hetimi ka rezultuar se kompania Integrated Energy BV SPV e kontrolluar nga Mërtiri dhe Zoto siguroi të ardhura me vlerë 11.3 miliardë lekë [120 milionë euro] gjatë viteve 2017-2023 dhe investoi për ndërtimin e objektit vetëm 21 milionë euro.

Nga vlera e stërmadhe e parave të zhdukura, SPAK ka dokumentuar mekanizmin e nxjerrjes së rreth 30 milionë eurove nga llogaritë e kompanisë koncesionare përmes mashtrimit, faturave fiktive dhe transferimit të tyre jashtë vendit përmes kompanive të tjera fiktive.

“Nga hetimi është evidentuar fakti se për të arritur qëllimin kriminal të pastrimit të parave, si produkte të veprës penale të mashtrimit, të pandehurit Mirel Mërtiri dhe Klodian Zoto kanë vepruar në bashkëpunim të veçantë në formën e grupit të strukturuar kriminal…,” thuhet në njoftimin e SPAK.

Kontratat koncesionare të incineratorëve përfaqësojnë një nga aferat më të mëdha të qeverisë së kryesuar nga kryeministri Edi Rama, ku premtimet për pastrimin e vendit nga plehrat u përdorën për të legjitimuar një nga vjedhjet më të mëdha në historinë e vendit.

Kontratat parashikonin ndërtimin e zonave të trajtimit të mbetjeve dhe tre incineratorëve në Elbasan, Fier dhe Tiranë, por dy të parët nuk funksionojnë, ndërkohë që projekti i tretë nuk u ndërtua asnjëherë.

Përveç Mërtirit, Zotos dhe grupit të drejtuar prej tyre, gjykatat kanë dënuar tashmë ish-ministrin e Mjedisit, Lefter Koka, ish-deputetin Alqi Bllako si dhe një grup zyrtarësh të nivelit të dytë të cilët kryen procedurat e koncesioneve.

Përgjatë gjashtë viteve të hetimit, Prokuroria e Posaçme e ndau dosjen në disa fraksione dhe i dërgoi ato veçmas në gjykatë, pavarësisht se bëhej fjalë për një grup njerëzish që akuzohen tashmë për grup të strukturuar kriminal. Sipas SPAK, fraksioni i fundit me numër 255/3 mbetet ende i hapur./ BIRN

Të fundit