Ironia e protestuesve, "veshin" Ramën me fustan rozë në samitin e NATO-s

Edhe në protestën e 39-të para Kryeministrisë, qytetarët kanë zgjedhur pankartat si një mënyrë për të shprehur pakënaqësitë dhe kritikat ndaj qeverisë së Edi Ramës.

Mesazhet e shfaqura në tubim kanë prekur tema të ndryshme, nga shpenzimet publike te shërbimet shëndetësore. Një prej pankartave ka rikthyer në vëmendje financimin e koncertit të Kanye West, ku protestuesit shkruanin: “4 mln € i duam për Onkologjikun, jo për dëngla”.

Një tjetër pankartë ka ironizuar paraqitjen e kryeministrit Edi Rama gjatë samitit të NATO-s në Ankara, përmes një fotomontazhi ku ai shfaqet me një fustan rozë, ndërsa Mark Rutte shihet duke i treguar veshjen Donald Trump.

Në mesin e mesazheve të tjera të protestuesve ishin edhe kritika ndaj propagandës qeveritare dhe gjendjes ekonomike të qytetarëve, me pankarta ku shkruhej: “Propagandë. Justifikime. Arritje. Asnjëra nuk do ta fshijë përgjegjësinë” dhe “Kanye West merr 4 milionë euro, prindërit e mi me 2 punë, shteti nuk paguan operacionet”.

Pankartat janë kthyer tashmë në një nga elementët më të spikatur të protestave të përditshme, ku qytetarët përdorin ironi dhe mesazhe simbolike për të adresuar kundërshtitë e tyre ndaj qeverisë.