Erion Veliaj copëton rrugën ‘Ibrahim Rrugova’, e zëvendëson me “Dëshmorët e 4 Shkurtit”. Nxiten reagime në Kosovë

Kryebashkiaku i Tiranës, Erion Veliaj, ka vendosur të ndajë një pjesë të rrugës “Ibrahim Rugova” dhe ta zëvendësojë gjysmën tjetër me emërtimin “Dëshmorët e 4 Shkurtit”.

E para që e ka denoncuar ka qenë deputetaj demokrate Jorida Tabaku, e cila përmes një postimi në Facebook shkruan se Veliaj ka bërë pjesë të luftës së klasave dhe lojës elektorale, edhe rrugën që mban emrin e Ibrahim Rrugovës.

“Fatkeqësisht, lufta e klasave rikthyer në 2023 e copëtoi këtë rrugë duke sajuar një tjetër gjysma rrugë me emërtim të një date që nuk është se personifikon apo bashkon dhe aq shqiptarët e aq më pak qytetarët e Tiranës. Se si mund të ulësh përbri rrugës Ibrahim Rugova hallin elektoral të Erion Veliaj, që do të prodhojë dëshmorë, vështirë se mund të kuptohet. Lë pastaj të përziesh historinë dhe ta retushosh”, ka shkruar Tabaku.

Për gazetën Nacionale ka folur edhe kryetari i Partisë Demokratike, Sali Berisha, i cili e ka cilësuar një turp të urrejtjes së Edi Ramë dhe Veliajt ndaj ish-presidentit Rugova, dhe zbatim të vendimeve të Beogradit.

"Ky është një akt turp i urrejtjes së Edi Ramës dhe Erion Veliajt ndaj presidentit Rugova dhe veprës së tij dhe Kosovës. Ky vendim njëlloj si refuzimi i tyre për vendosjen e shtatores së presidentit Rugova dhe qëndrime tjera armiqësore ndaj Kosovës janë zbatim i urdhërave të dhënë nga Beogradi për vasalët e tij në Tiranë", pohoi ai.

Lidhur me çështjen ka reaguar edhe anëtari i këshillit të Ambasadorëve Shqiptarë, Flamur Gashi, i cili është shprehur se me këtë veprim vërtetohet “urrejtja patologjike” ndaj Kosovës.

“Po urrejtja patologjike ndaj Kosovës, nga ana e neokomunisteve dhe pinjolleve ideologjik te Milladin Popoviqit dhe Dushan Mugoshes ne Tiranë”, është shprehur Gashi.

Reagime nga Kosova

Deputeti i Lidhjes atë Kosovës, Besian Mustafa ka thënë se vendimi i Veliajt, për ta copëtuar rrugën “Ibrahim Rugova”, shkurton vetëm kryeqytetin shqiptar.

“Në vazhdën e këtyre përpjekjeve është tash tentimi i Tiranës për të tkurrur emrin e Ibrahim Rugovës duke tkurrur, shkurtuar, rrugën me emrin e tij. Kjo marrëzi e tkurr veç Tiranën, assesi Rugovën, viganin e kombit në mesin e atyre nga Gjergj Katrioti deri te Gonxhe Bojaxhiu”, shkruan Mustafa në Facebook.

Po ashtu, anëtari i Kryesisë së Lidhjes Demokratikë të Kosovës, Muhamet Hamiti, ka shkruar se ish-presidenti Rugova është figura më e madhe shqiptare e shekullit dhe si i tillë, Hamiti thotë se nuk ka rëndësi çfarë bën pushteti kalimtar i Rilindjes.

“Presidenti Ibrahim Rugova, Ati Themeltar i shtetit të Kosovës, është figura më e madhe shqiptare e shekullit. S’ka rëndësi çka bën pushteti kalimtar i Rilindjes. Ibrahim Rugova është President historik”,  ka shkruar Hamiti.

Për publicistin Nexhmedin Spahiu, ndryshimi i emrit të gjysmës së rrugës “Ibrahim Rugova” është poshtërim i figurës së ish-presidentit Rugova.

“Shpreh fuqishëm protestën për ndryshimin e emrit të gjysmës së rrugës "Ibrahim Rugova" në Tiranë. Ky është një poshtërim figurës se themeluesit të shtetit të Kosovës që po ia bëjnë Edi Rama e Erion Veliaj”, ka shkruar Spahiu.

Edhe aktivisti e zyrtari i Vetëvendosjes në Tiranë, Elvis Hoxha, shkruan se ky veprim nënkupton armiqësi nga ana e Veliajt.

“Emri i një rrugë shumë dinjitoze e humb emrin e saj Ibrahim Rugova. E kanë përgjysmuar rrugën. Nuk ka asnjë arsye. Kjo është një armiqësi e pashembullt e kryebashkiakut të Tiranës”, ka shkruar Hoxha në Facebook.

Institucioni i cili do të duhej të bënte një reagim, Bashkia e Tiranës, ka preferuar të qëndrojë e heshtur deri tani.