Rreziku nga motorët e ujit/ Nano urdhëroi dy ditë më parë patrullimin e vijës bregdetare, efektivi goditi sot 7-vjeçaren

Ajran Tase, me detyrë Shef Seksioni i Policimit në Komunitet në Komisariatin e Policisë Elbasan, goditi sot për vdekje me skaf një 7-vjeçare në plazhin e Potamit në Himarë.

Tase ishte duke drejtuar skafin kur aksidentoi për vdekje 7-vjeçaren në breg të detit. Pas ngjarjes, Tase u arrestua dhe është përjashtuar nga radhët e Policisë së Shtetit.

Por, ngjarja e sotme nuk është e para për këtë sezon pushimesh. Tragjedia e sotme ishte një ngjarje e paralajmëruar prej kohësh kur denoncimet e qytetarëve për mungesën e rojeve bregdetare në plazhe, kanë qenë të vazhdueshme.

Më 16 korrik u shënua incidenti i parë me mjetet e ujit. Një 37-vjeçar humbi kontrollin e motorit të ujit dhe përplasi një çift pushuesish që po qëndronin në bregun e Jalës. Çifti i turistëve, një 31-vjeçar dhe një 25-vjeçare, pësuan lëndime serioze, ndërsa drejtuesi i mjetit u vu në pranga.

Ngjarja e 16 korrikut u pasua në plazhin e Jonufrës vetëm dy ditë më vonë. Një 40-vjeçar duke lundruar në ujë me mjetin e tij tip gomone përplasi një 7-vjeçar duke e lënë të plagosur.

Drejtori i Përgjithshëm i Policisë së Shtetit Gledis Nano dha më 31 korrik një urdhër që kërkonte marrjen e masave shtesë përgjatë muajit gusht, për mbarëvajtjen e sezonit turistik.

Në një letër porosi, Nano iu kërkoi drejtorëve vendorë dhe të kufirit marrjen e menjëhershme të masave shtesë për sigurinë e pushuesve.

Nano urdhëroi patrullimin e vijës bregdetare, aty ku ka grumbullime masive të pushuesve si dhe të filmojnë në çdo rast që ka tentativa për manovra të rrezikshme nga “Jet ski”-të apo skafet, qoftë brenda perimetrit të sigurisë, ashtu edhe në afërsi të perimetrit të sigurisë.”

“Qoftë punonjësit civilë, ashtu edhe punonjësit me biçikleta apo me patrullat e rendit, për çdo rast të konstatuar, filmimet t’ua dërgojnë menjëherë Policisë Kufitare, e cila të reagojë në kohë reale duke bllokuar mjetin dhe duke e ndëshkuar me masë administrative”, thuhej në letër-porosinë e Nanos.

Por, muaji gusht që sipas urdhrit të Drejtorit të Përgjithshëm të Policisë të Shtetit duhej të niste me patrullime dhe kontrolle të vijës bregdetare, konstatoi në dështim të ruajtjes dhe sigurisë për pushuesit.

Autori i aksidentit të radhës me motorët e ujit ishte për më tepër një efektiv policie, i akuzuar dhe i pezulluar për veprën penale të “Shpërdorimit të detyrës”, pasi dyshohej se kishte lejuar kultivimin e lëndëve narkotike në dy fshatra të Vlorës.