Xhaferraj i ‘kërkon llogari’ për përmbytjet, Rama i shmanget përgjegjësisë: Nuk e shpall gjendjen e emergjencës

Deputeti demokrat Ferdinand Xhaferaj thirri në interpelancë kryeministrin Edi Rama për situatën e përmbytjeve në vend. Sipas deputetit, përmbytjet ndodhën për shkak të hapjes së HEC-eve.

Ai i renditi Ramës një sërë pyetjes që lidheshin me kërkesën për të shpallur gjendjen e fatkeqësisë natyrore, vlerësimin e dëmeve dhe ndihmën e parashikuar për banorët.

“Nisur nga kjo situatë vërtet kritike, vecanërisht në qarqet Shkodër, Lezhë dhe Durrës, Grupi Parlamentar i Partisë Demokratike, me përgjegjësi të lartë politike dhe qytetare, vendosi të ndërmerrte dy veprime konkrete, gjithnjë në favor të interesit publik dhe kurrësesi me qëllim përfitim nga një fatkeqësi në kurriz të qytetarëve tanë.

Së bashku me kolegët e grupit, ne kërkuam zhvillimin e kësaj interpelance urgjente me kryeministrin, për të dhënë informacione dhe shpjegime lidhur me situatën e përmbytjeve në vend dhe masat e ndërmarra nga ana e institucioneve shtetërore.

Po ashtu, Grupi Parlamentar i Partisë Demokratike, në mbështetje të nenit 174 të Kushtetutës dhe nenit 39 të ligjit nr. 45/2019 “Për Mbrojtjen Civile”, ka kërkuar shpalljen e gjendjes së fatkeqësisë natyrore në qarqet Shkodër, Lezhë dhe Durrës.

E di që pas meje, kryeministri do të vijë këtu, dhe sic i është bërë zakon, do të lëshojë një batërdi sharjesh dhe fyerjesh ndaj deputetëve të opozitës, si njerëz pa fe e pa atdhe, por ajo që ka rëndësi për ne ta dinë qytetarët është se kjo opozitë, ky grup parlamentar qëndron në mbrojtje të interesit të tyre, e në këtë rast të jetës, shëndetit dhe pronave të tyre.

Por, kryeministri duhet të vijë këtu dhe t’u japë përgjigje disa pyetjeve për qytetarët shqiptarë:
1. A kishte informacione dhe të dhëna qeveria shqiptare nga Departamenti i Meterologjisë, pranë Institutit të Gjeoshkencave, dhe Shërbimi Meterologjik Ushtarak, lidhur me reshjet e pritshme të datës 20 Nëntor e në vijim?
2. Nëse po, cilat ishin masat e marra nga qeveria shqiptare për të siguruar jetën, shëndetin dhe pronat e qytetarëve tanë?
3. A u bënë shkak për përmbytjen e zonave të nën-Shkodrës hapja e portave dhe shkarkimet e hidrocentraleve të Komanit dhe Vau Dejësit, sic deklaroi prefektja e qarkut Shkodër, Znj. Angoni?
4. Pse nuk u lajmëruan familjet që prekeshin nga përmbytjet si rezultat i shkarkimeve të hidrocentraleve që të merreshin masat e nevojshme, përfshirë evakuimin e banorëve dhe gjësë së gjallë?
5. A ka qeveria shqiptare sot një inventar të plotë të shtëpive, tokave, arave me të mbjella, bagëtive, pallateve, akseve rrugore të përmbytura apo të dëmtuara nga vërshimi i ujit dhe përmbytjet?
6. A ka bërë qeveria shqiptare një vlerësim paraprak të dëmeve materiale të shkaktuara qytetarëve?
7. Ministri i Mbrojtjes, Peleshi ka përsëritur disa herë që qeveria iu ka akorduar bashkive një fond prej 10 mln dollarë për përballimin e gjendjes së fatkeqësisë natyrore, por ndërkohë nuk thuhet nëse ky është një fond për të gjitha bashkitë apo për secilën bashki më vete. Megjithatë, nga vlerësimi paraprak i kryer nga ana juaj, a është ky fond i mjaftueshëm për përballimin e dëmeve të shkaktuara?
8, Nga të dhënat që dispononi, a pritet që situata e motit, e për rrjedhojë edhe niveli i reshjeve të përkeqësohet në ditët në vijim? Nëse po, cilat janë masat e marra nga ana juaj apo që do të merren në ditët në vijim?
9. Cilat janë projektet apo investimet konkrete që qeveria shqiptare ka kryer në këto 9 vite për parandalimin e përmbytjeve në qarqet Shkodër, Lezhë dhe Durrës?
10. A ka vlerësuar qeveria shqiptare mundësinë e transferimit të banorëve, të cilët jetojnë në zona të rrezikuara nga përmbytjet, në zona më të sigurta? Nëse po, cilat kanë gjetjet e këtij vlerësimi dhe cilat janë masat e marra?
11. A do të shpallë qeveria gjendjen e fatkeqësisë natyrore sipas kërkesës së bërë nga deputetët e PD-së, që do t’i mundësojë institucioneve mjetet dhe masat adekuate për t’iu përgjigjur situatës?”-tha Xhaferraj.

Në përgjigje, Rama tha se nuk janë kushtet për shpalljen e gjendjes së emergjencës. Ai hodhi akuza ndaj opozitës, duke i etiketuar “kusarë”, ndërsa u shpreh se në kohën e qeverisjes demokratike, situata e përmbytjeve ishte më e rëndë.

“Meqë do ta marr fjalën dhe njëherë tjetër, përgjigjen se ku është çeta e kusarëve do tua jap shumë të plotë sot. Ndërkohë që për sa i përket çështjeve të ngritura prej jush në parantezën e bërë lexova që shqetësimi juaj kryesor dhe pyetja juaj kryesore ishte pse nuk shpallet gjendja e emergjencës. Gjendja e emergjencës ka një kuadër të plotë ligjor, kritere të përcaktuara që nuk kanë asnjë lidhje me situatën aktuale.

Nuk dëshiroja të hyja në krahasime, por meqë hytë ju në krahasime, i qëndroj asaj që ndatë bujarisht me publikun sepse janë faktet që flasin shumë qartë dhe ai sinkron është nxjerrë nga një moment katastrofik për Shkodrën dhe për gjithë zonën e perëndimit si rezultat i keqadministrimit skandaloz, kriminal, korruptiv të kaskadës, ajo ishte e vërtetë dje, është e vërtetë sot.  Këtë herë nuk ka asnjë lidhje me kaskadën, fare, zero, zero dhe 4 mijë që sollët ju nuk është vetëm për Shkodrën, por për gjithë zonën dhe Lezhën”, tha Rama.