SPAK i preu sot fletë-arrestin: Kush është Ergys Agasi, i cilësuar si “koordinatori” i Ramës me grupet kriminale?

Hetimet e Prokurorisë së Posaçme kundër Korrupsionit dhe Krimit të Organizuar kanë sjellë një tjetër zhvillim të fortë në dosjet që lidhen me dyshime për korrupsion të nivelit të lartë dhe lidhje mes politikës, tenderëve publikë dhe interesave kriminale.

SPAK ka ekzekutuar masa sigurie në kuadër të hetimeve që po kryen prokurori Bledar Maksuti lidhur me abuzimet në tenderat e AKSHI-t, mes tyre biznesmeni Ergys Agasi, emër i përmendur prej kohësh në debate publike dhe investigime mediatike për lidhjet e forta me qeverinë Rama dhe rolin e tij si ndërmjetës me eksponentë kriminalë.

Akuza të forta nga Arben Ahmetaj: Agasi, koordinatori mes Ramës dhe grupeve kriminale

Ish-zëvendëskryeministri Arben Ahmetaj, aktualisht në arrati, ka hedhur akuza të rënda publike ndaj kryeministrit Edi Rama, duke deklaruar se lidhjet e pushtetit me botën e krimit realizohen përmes një “koordinatori”, të cilin ai e identifikon si Ergys Agasi.

Në një komunikim të regjistruar me gazetarin investigativ Giorgio Mottola (RAI 3), Ahmetaj pretendon se grupet kriminale përfitojnë tendera publikë përmes përfaqësuesve të tyre dhe paratë e përfituara nga aktivitetet kriminale në Europë pastrohen përmes ndërtimit dhe investimeve në Shqipëri. Sipas tij, Agasi shërben si “nyja lidhëse” mes kryeministrit dhe këtyre grupeve.

“Nuk është vetëm i lidhur, por po të jap emrin e koordinatorit, Ergys Agasi. Është një tip që jeton në Durrës, pranë klanit të Durrësit. Tani është bërë për llogari të Ramës, koordinator i të gjithë grupeve”, shprehet Ahmetaj, duke theksuar se takime me përfaqësues të botës së krimit, sipas tij, janë zhvilluar edhe në ambientet e Kryeministrisë.

Kush është Ergys Agasi?

Ergys Agasi është biznesmen nga Durrësi, djali i një ish-deputeti të Partisë Socialiste. Ai ka qenë aktiv në disa sektorë biznesi, përfshirë: prodhimin e cigareve, logjistikën, ndërtimin, tregtinë dhe sportin.

Sipas të dhënave publike nga regjistrat tregtarë, Agasi rezulton pronar ose bashkëpronar në disa kompani. Deri më tani, nuk ka pasur një vendim gjyqësor përfundimtar që ta dënojë për lidhje me krimin e organizuar, megjithatë emri i tij është përmendur shpesh në media për raporte të dyshuara me figura të botës së krimit, përfshirë edhe individë të njohur për trafik narkotik.

Kontrolle dhe sekuestrime nga BKH

Gjatë kontrolleve të zhvilluara në banesën e tij në Durrës në qershor të këtij viti, agjentët e BKH kanë sekuestruar: dokumente telefona celularë, laptopë dhe materiale të tjera, të cilat, sipas burimeve, dyshohet se mund të kenë vlerë për hetimin penal. SPAK nuk ka dhënë detaje zyrtare mbi përmbajtjen e tyre, duke ruajtur konfidencialitetin e dosjes.

Rrjeti familjar dhe pozicionet shtetërore

Gazetarja Klodiana Lala ka publikuar më herët të dhëna mbi familjarë dhe të afërm të Agasit, të cilët rezultojnë të punësuar në pozicione drejtuese në institucione shtetërore, kryesisht në qarkun e Durrësit.

Xheni Beqaj (kunati i Fatmir Troplinit) - Drejtor i Targave dhe Patentave;

Gerti Hoxha (djali i hallës së Ergys Agasit)- Drejtor rajonal i OSHEE-së për Qarkun Durrës

Arsen Agasi (djal i xhaxhait të Ergys Agasit) shef i AKU për Portin;

Klesti Cela, kunati i Agasit -  Drejtor ASHK Tirana Rurale

Këto të dhëna janë ngritur në formën e dyshimeve për ndikim dhe nepotizëm, pa një vendim gjyqësor që t’i certifikojë si shkelje ligjore.