A do të “veshë pantallona apo fustan” qeveria për betejën kundër korrupsionit?

Këtë të enjte u zhvillua seanca e radhës në Kuvend, ku u votuan Komisionet e Posaçme për “Antikorrupsionin” me 73 vota pro, 7 kundër dhe 1 abstenim dhe Komisioni për “Dezinformimin” me 73 vota pro dhe 7 kundër dhe asnjë abstenim.

 “Xhaketa e vjetër” socialiste që udhëhoqi Reformën në Drejtësi 8 vite më parë, ose i vetëquajturi “Babai i Reformës në Drejtësi”, Fatmir Xhafaj, është përzgjedhur nga kryeministri Edi Rama për të qenë në krye të kësaj strukture së bashku me Klotilda Bushkën, Eduard Shalsin, Etilda Gjonajn, Evis Kushin e Toni Gogun.

Në mesin e gjithë debateve, bojkotit nga ana e opozitës, “vështirësisë” për të zgjedhur anëtarët e këtij komisioni, vetvetiu lind pyetja: Si mund të luftosh veten tënde? A mund të jesh aq burrë, saqë për helmin e  shpërndarë me vetëdije për kaq shumë vitesh ti japësh kundërhelmin?

Shokuese! Do të ishte një shpresë e bukur, por papritur përplasesh me fakte. Një qeveri që thotë se do të luftojë korrupsionin ndërkohe në venat e saj, dhjetëra figura kanë përfunduar në qeli ose në dyert e SPAK.

Është pak përtej imagjinatës, nëse qeveritarët do të “veshin” pantallona apo do të vishen me fustan, duke i pasur vetëm llafe pasi kjo duket se është një nismë partiake, me shumë si një reklamë e kopsitur bukur sesa një komision për goditjen e korrupsionit.

Rama prezantoi fillimisht atë që njihet si “Rezoluta për thellimin e reformave për mirëqeverisjen, sundimin e ligjit dhe antikorrupsionin për Shqipërinë 2030 në Bashkimin Evropian” në një takim të Partisë Socialiste në prill.

Kur rezoluta u miratua nga parlamenti më 27 maj, Rama  tha se nisma “është e nevojshme për anëtarësimin e Shqipërisë në BE”.

Por shqetësime janë ngritur gjithashtu se ajo mund të përbëjë një përpjekje për të ndërhyrë në sistemin e reformuar të drejtësisë në vend dhe për të penguar punën e SPAK dhe Gjykatës së Posaçme Kundër Krimit të Organizuar – organe të krijuara si rezultat i një programi reforme në drejtësi që ka vazhduar me mbështetjen e SHBA dhe BE-së, që nga viti 2016.

Komisioni i ri i Posaçëm i Ramës, do të mund të thërrasë në parlament krerët e institucioneve të drejtësisë.

 

Opozita “lëkund” Kuvendin

Grupi parlamentar i Partisë Demokratike, nuk mori pjesë në votim, duke thënë se nuk mund të mbështeste nismat kundër korrupsionit nga ajo që e përshkroi si një qeveri të korruptuar.

Gazmend Bardhi, kreu i grupit parlamentar të PD, u shpreh se lufta ndaj korrupsionit, mirëqeverisja dhe shteti ligjor për të cilat flet kryeministri Edi Rama, janë vetëm propagandë e ditës.

Po sot në Kuvend teksa u votua, kundër për Komisionin “Antikorrupsion” votuan; Lindita Metaliaj, Dashnor Sula, Edmond Spaho, Dashamir Shehi, Oerd Bylykbashi, Tritan Shehu.

E teksa brenda në Kuvend po bëheshin diskutimet opozita dhe qytetarët kanë protestuar para Parlamentit duke u përplasur dhe me policinë dhe duke ndezur zjarr me goma. Indicia kryesore e kësaj proteste ishte një pjesë e emisionit italian Rai 3, ku qeveria shqiptare dilte hapur e përfshirë me krimin dhe korrupsionin.

Opozita kërkoi dorëheqjen e kryeministrit Edi Rama pas skandaleve të shumta dhe faktin se mediat e huaja e kanë cilësuar Shqipërinë si një narkoshtet.

Kryeministri Edi Rama ka reaguar pas tensioneve të fundit në Kuvend dhe protestës para këtij institucioni.

Rama shprehet se autorët e rikthimit kaq të shpejtë në identitet të opozitës sot në parlament, ishin Arben Ahmetaj, Sali Berisha, një kriminel italian i dënuar 17 vjet nga drejtësia shqiptare, një ish-prokuror i përjashtuar nga sistemi i drejtësisë dhe programi i RAI 3.

Vesi del me shpirtin, thotë kryeministri, por shton se shpirtit të së keqes që po del me të çjerra nga jeta e këtij vendi. Gjithashtu shkruan: “Mos i falni më, duhen shkatërruar përfundimisht me votë”.

 Thirrja e Ramës

Ndërkaq më 27 MAJ 2024, Kuvendi i Shqipërisë miratoi pr. rezolutën anti korrupsion dhe mirëqeverisje të propozuar nga Partisë Socialiste.

Vetë kryeministri për të mbrojtur pr/rezolutën duke e bërë të qartë se komisioni i posaçëm nuk ka lidhje me punën e prokurorisë së Posaçme, ftoi opozitën ta votojë.

Nëse nuk e votoni u tha Rama, nesër të mos bojkotojnë Komisionin e Posaçëm anti-korrupsion, për të cilin tha se do të ngrihet menjëherë pas miratimit në Kuvend.

Po ashtu kryeministri nuk “harroi” që të bëjë vetëvlerësim duke nënkuptuar se është i zgjuar dhe largpamës.

“Thirrja ime është votojeni sot draftin e rezolutës dhe po nuk e gjetët këtë forcë për ta bërë, mos e bojkotoni nesër Komisionin e Posaçëm Parlamentar që do të ngrihet menjëherë pas miratimit të saj. Sa herë që ju kam thënë në këtë sallë, kthejuni memories, 10 vjet e kusur, “mos e bëni këtë, mos bëni atë, këtë bëjeni, shikoni bëni këtë”, ka dalë siç iu kam thënë, jo siç keni bërë apo nuk keni bërë ju dhe e dini pse?

Për një arsye shumë të thjeshtë. Jo se unë jam më i zgjuar apo më i zoti sesa ju, por sepse ju s’keni dashur kurrë ta mësoni se vendimmarrjet me shikimin deri tek hunda jote, rrugën që duket shumë e shkurt ta bëjnë pafundësisht të gjatë dhe prandaj ne jemi këtu dhe ju jeni aty”, tha Rama gjatë fjalës së tij.

 

Deputetët socialist “të kulluar”

“Krimi, krimi, droga droga”, e tanimë “mafja mafja, tendera tendera, korrupsion, korrupsion”. Më poshtë po ju listojmë disa nga deputetët e Parlamentit të Shqipërisë të cilët e kanë “emrin e zi” në botën e drejtësisë dhe ligjit.

1. Fatmir Xhafaj, i vetëquajturi “Babai i Reformës në Drejtësi”,  është subjekt i ligjit “Antimafia”, për shkak se është vëllai i Geron Xhafaj, një eksponent i krimit të organizuar në Vlorë, i dënuar në Itali për përfshirje në grup kriminal që trafikonte lëndë narkotike në Itali

Operacioni “Forca e Ligjit” (OFL), i inicuar në fillim të vitit 2020, parashikonte hetim pasuror për të gjithë subjektet e krimit të organizuar dhe familjarëve të tyre të afërt. Disa vite më parë, u përmend shkarazi në media se struktura e OFL-së i dërgoi Geron Xhafaj dhe familjarëve të tij (përfshirë edhe vëllain Fatmir Xhafaj), formularin për vetëdeklarimin e pasurisë, i cili më pas do i nënshtrohej hetimeve nga SPAK-u.

Nuk ka asnjë detaj nëse SPAK-u ka kryer hetim pasuror ndaj vëllezërve Fatmir e Agron (Geron) Xhafaj, edhe pse kanë kaluar 4 vjet. Tashmë, deputeti Fatmir Xhafaj qëndron para kreut të SPAK-ut dhe bën filozofime mbi forcimin e luftës kundër kriminalitetit.

2. Olta Xhaçka, deputetja e Partisë Socialiste, ish-ministre e Mbrojtje dhe e Jashtme, është subjekt dy herë në hetimet e SPAK-ut. Ajo dhe bashkëshorti i saj, Artan Gaçi, janë pjesë e hetimit për tjetërsimin e një sipërfaqe toke në Dhërmi, ku më pas kryeministri Edi Rama i shpalli “investim strategjik”.

Olta Xhaçka është gjithashtu pjesë e një hetimi të zhvilluar nga SPAK-u për procedurat e zhvilluara nga Ministria e Mbrojtjes, kur drejtohej nga Xhaçka, lidhur me tjetërsimin e portit të Limionit në Sarandë, i cili u dha për “investim strategjik”.

3. Eduard Ndreca, deputeti socialist i Lezhës që përmendet në dosjen “Metamorfoza 3”, ishte gjithashtu i vëmendshëm në raportimin më të fundit të Altin Dumanit në Parlament.

Të dhënat e dosjes hetimore tregojnë një pasazh, në të cilat Arian Tuku, dhëndri i ish-deputetit Arben Ndoka, diskuton në Tetor të vitit 2020 me një bashkëpunëtorin e tij, për sigurimin e një ngarkese prej rreth 300 kg lëndë narkotike, kanabis.

4. Damian Gjiknuri, deputet socialist, ish-Ministër i Energjitikës, është një prej emrave kyç në atë që konsiderohet si “afera e inceneratorëve”. Ai është në top-listën e personave të kallëzuar penalisht nga Partia Demokratike, pas përfundimit të punimeve të Komisionit Hetimor Parlamentar për çështjen e impianteve të djegies së mbeturinave.

5. Xhemal Qefalia, deputet i Partisë Socialiste, i kallëzuar në SPAK së bashku me familjarë të tij të afërt për përfitime të dyshimta nga fondet e Bashkisë së Tiranës.

LEXO EDHE

https://politiko.al/ditari-i-maxhorances/spak-mbytet-nga-kryebashkiaket-socialiste-mbreti-ja-hedh-pa-i495874