SKANDALI/ Shkelje dhe manipulime në procesin zgjedhor në Elbasan

Partia Demokratike ka denoncuar këtë të dielë manipulimet dhe shkeljet e zbuluara gjatë procesit zgjedhor në Elbasan.

Gjatë një deklarate për media nga ana e kryetarit të KZAZ Nr. 47, të Bashkisë Elbasan, Anton Prekaj janë bërë publike shkeljete gjetura.

Prekaj deklaron se nga KQZ i është bërë presion disa herë dhe disa ditë rresht për t’i miratuar tabelat e tyre, deri edhe me ndjekje penale.

Deklarata e plotë:

“Jam këtu në cilësinë e kryetarit të Komisioni Zonal të Administrimit të Zgjedhjeve (KZAZ) nr 47 të Bashkisë Elbasan, për të denoncuar parregullsitë dhe shkeljet e vërejtura në të gjitha etapat e procesit zgjedhor në këtë KZAZ. Konkretisht:

Nga Komisionet e Qendrave të Votimit janë dorëzuar në KZAZ 47, 72 pajisje elektronike të votimit dhe numërimit (PENV), pa vulë sigurie, shkelje e rëndë kjo e pasqyruar në për verbalet përkatëse të dorëzuara në KQZ.

Komisioni Zonal i Administrimit Zgjedhor ne 47, ka certifikuar rezultatin e nxjerrë nga operatorët, të cilat janë depozituar në Komisionin Qendror te Zgjedhjeve KQZ

Ditën kur janë dorëzuar tabelat e rezultateve dhe tabelat përmbledhëse në KQZ, na është kërkuar që të plotësojmë tabela të tjera me rezultate të ndryshme nga ato që Pajisjet e Votimit kanë printuar dhe ne i kemi certifikuar më parë për Qendrat e Votimit Nr. 2481/1 dhe 2483. Pretendimi i tyre ka qenë sepse pajisja e dorëzuar ka të dhëna të tjera nga ato që ne kishim certifikuar me Vendim unanim të KZAZ47. Kjo është një pikëpyetje shumë e madhe që ngre shumë dyshime.

Unë dhe komisionerët e opozitës kemi refuzuar me arsyetimin se nuk mund të nxirren tabela rezultatesh te ndryshme për të njëjtën QV, duke i kërkuar KQZ që ata të korrigjojnë tabelat finale bazuar edhe në Kodin Zgjedhor.

Nga KQZ më është bërë presion disa herë dhe disa ditë rresht për t’i miratuar tabelat e tyre, deri edhe me ndjekje penale.

Denoncoj këto praktika të dyshimta, që vënë në pikëpyetje të gjithë procesin dhe ngrenë dyshime për devijim dhe manipulim të rezultatit zgjedhor në Bashkinë Elbasan.”