Flutura Açka shpall platformën për zgjidhjen në PD, propozon Berishën drejtues të Këshillit të të Urtëve, Bashën si anëtar

Deputetja demokrate Flutura Açka k shpallur platformën me propozimet e saj për të zgjidhur krizën brenda PD-së, duke vënë theksin fillimisht mbi bashkimin e të dyja palëve të partisë.

Në platformë, deputetja parashikon ngritjen e Këshillit të Bashkimit i cili synon hapjen e PD-së, bashkimin nën një logo dhe slogan të demokratëve, dhe shpalljen e muajit shtator për zgjedhjen e kreut të ri të PD dhe krerëve të degëve.

Açka thekson se demokratët do të duhet të bashkohen për të ngritur Këshillin e Bashkimit, “i përbërë nga anëtarë të zgjedhur me mirëkuptimin e të dyja palëve, një grup i zhdërvjellët, punëmbaruar dhe mendjehapur, autoritarë dhe të papërfolur, dhe jo më shumë se 10-15 vetë. Ky Këshill, të cilit do t’i besohet procesi i bashkimit dhe hapjes së PD-së, do të ndihmohet nga një shtab, më së shumti të rinj, që do të përgatisin të gjithë infrastrukturën për ta çuar deri në fund projektin e bashkimit të PD-së, i cili duhet të nisë menjëherë”.

Sipas Açkës, ky këshill ka për qëllim të shpallë:

- Bashkimin e plotë të Partisë Demokratike nën një logo, nën një slogan. Për këtë Këshilli i Bashkimit të PD-së duhet të bëjë një tur të plotë në bazë në çdo rajon e strukturë vendore, në mënyrë që të përçojë kushtet e bashkimit dhe të krijojë lidhjet e humbura me demokratët kudo që të jenë.

-Një amnisti të plotë politike, morale, etike, shpirtërore mes demokratëve. Të kërkojë prej demokratëve të shuajnë inatet e vjetra dhe ato të mbjella rishtas dhe t’u kërkojë ta nisin nga e para.

-Pavlefshmërinë e zgjedhje të njëanshme të kryera deri tani në strukturat vendore nga Komisioni i Rithemelimit, proces që i ka lënë jashtë një pjesë të mirë të demokratëve dhe të përgatisë kushtet për zgjedhjet e reja gjithëpërfshirëse.

-Hapjen e PD-së ndaj shoqërisë shqiptare, ndaj shoqërisë civile dhe kujtdo që dëshiron të kontribuojë në demokraci, ndaj personaliteteve të të gjitha fushave dhe veçmas ndaj Diasporës së Re Shqiptare, e cila është e gatshme të ndikojë në fatet e vendit.

-Hapjen e menjëhershme të fushatës së zgjedhjeve për kreun e Partisë Demokratike, që do të vijoje pas hapjes së PD-së, përmes një procesi të gjatë, transparent, të ndershëm, të barabartë dhe promovues. T’i jepet mundësia vajzave e djemve me kontribute në PD, por edhe të tjerë kontibutorëve shiqërorë dhe atyre të Diaporës të konkurrojnë në drejtimin e Opozitës. Të krijojë të gjitha lehtësirat dhe barazinë në promovimin e demokratëve në bazë, por edhe të figurave të përzgjedhura nga procesi i seleksionimit për strukturat qendrore të saj.

- Muajin Shtator si koha për zjedhjen e Kryetarit të ri të PD-së dhe për Krerët e Degëve në rrethe.

Njëherazi, Açka shtron edhe propozimin për ngritjen e Këshillit të të Urtëve, ku fton të marrin pjesë figura të vjetra të PD si: Jozefina Topalli, Astrit Patozi, Lulzim Basha, Preç Zogaj, Majlinda Bregu e të tjerë. Ndërsa propozon që Këshilli të drejtohet nga ish-kryeministri Sali Berisha.