Ish-deputeti socialist “shigjeton” Ballukun: Rastet flagrante të korrupsionit duhen kallëzuar penalisht

Zërat kritikë në radhët e socialistëve duket se po shtohen, ndërsa ish-deputeti Petro Koçi ka lëshuar një sërë mesazhesh që janë interpretuar si sinjale të drejtpërdrejta për drejtues të lartë të mazhorancës.

Në një reagim të gjatë lidhur me protestat qytetare dhe luftën kundër korrupsionit, Koçi kërkoi që Partia Socialiste të reflektojë thellë mbi mënyrën e funksionimit të saj, duke vënë në pikëpyetje modelin e përqendrimit të pushtetit te personat e deleguar politikisht.

Pa përmendur emra konkretë, ai la të kuptohet se individët që ndodhen nën hetim apo ndjekje penale nuk duhet të vazhdojnë të mbajnë funksione të rëndësishme politike. Një deklaratë që është lexuar si një thumbim ndaj figurave të fuqishme brenda qeverisë, mes tyre edhe zv.kryeministres Belinda Balluku.

Koçi theksoi se qeveria nuk duhet ta delegojë të gjithë barrën e luftës kundër korrupsionit te SPAK-u, por duhet të reagojë vetë ndaj rasteve flagrante të shpërdorimit të detyrës.

Ish-deputeti socialist shkoi edhe më tej, duke propozuar një ligj të posaçëm që do t’u hiqte imunitetin zyrtarëve të lartë për të paktën dhjetë vitet e ardhshme, si dhe forcimin e mëtejshëm të kompetencave të SPAK-ut.

Reagimi i plotë

Duke shprehur publikisht mbështetjen për aksionet e fundit të SPAK kundër krimit të organizuar që ka shtrirë tentakulat e pastrimit të parave në ndërtim, blerje dhe përvetësim tokash etj nuk mund të mos reagoj sërish për protestat e përnatshme në Bulevardin Dëshmorët e Kombit.

Shumica e pjesëmarrësve aty janë idealistë, të pakënaqur nga administrata dhe misionarë për çështje të pastra publike. Sigurisht që benzina politike vjen kryesisht nga e djathta e menjanuar nga Sali Berisha, nga arrivistë të çdo lloji që shohin shanse për t’u promovuar në të ardhmen në Kuvend. Nuk mungojnë as krerët e partickave të rrjeteve sociale që na bëjnë si gazetarë politikë me celularë në dorë.

Parrulla e Ballit Kombëtar “Shqipëri e shqiptarëve, vdekje tradhëtarëve” e vërteton përpjekjen që protesta të përdoret për revansh të së djathtës ndaj së majtës.

Por protesta e idealistëve duhet të shfrytëzohet si energji popullore për të zhvilluar një demokraci të garantuar institucionale, forcim të luftës ndaj korrupsionit nëpërmjet fuqizimit të SPAK dhe vendosjes së standarteve për barazi dhe solidaritet social bashkëkohor.

PS-së nuk i duhet nënshtrim, por reflektim serioz që përfshin reformë kushtetuese e ligjore në këto piketa:

1-Anulim i ndryshimeve kushtetuese të 21 Prillit 2008 të propozuara nga Sali Berisha që e kthyen Republikën nga parlamentare në kryeministrore.

Kjo do të krijonte frymëmarrje dhe oksigjen për kontroll të parlamentit mbi ekzekutivin.

2-Forcim ligjor i funksionalitetit dhe efikasitetit të SPAK të shoqëruar me një ligj special që heq imunitetin e zyrtarëve të lartë të paktën për 10 vitet e ardhshme.

3-Hartimi dhe aprovimi i një sistemi zgjedhor që garanton pluralizëm dhe barazi përfaqësuese në raport me votat në nivel kombëtar.

4-Rreptësimi i mbikëqyrjes dhe penalizimit për përfshirjen e administratës shtetërore në proceset zgjedhore.

5-Ndërmarrja e një reforme praktike në funksionimin dhe rezultatet e Kadastrës ku një zgjidhje e shumëpritur do ishte kalimi i kompetencës për lëshimin e vërtetimeve të pronave të certifikuara te noterët.

Ndërkohë qeveria nuk mund ta lërë luftën kundër korrupsionit vetëm në duart e SPAK. Rastet flagrante të shpërdorimit duhet të shoqërohen me masa publike administrative dhe kallëzime penale.

Vetë PS ka nevojë të zëvendësojë skemën e përqendrimit të pushtetit nga duart e të deleguarve drejt të zgjedhurve të strukturave të bazës.

Dhe natyrisht të lirojë nga delegimi çdo individ nën ndjekje penale.

Në fund theksoj që protesta duhet trajtuar me pjekuri, as me armiqësi, por as me naivitet.

Le të shërbejë pjesa e pastër e saj si një investim për më shumë demokraci dhe jo thjesht për ndërrim të të ndenjurave të pushtetit.

Vetëm nga demokracia përfiton shumica dhe populli.

Vetëm kështu protesta do ta nxiste dhe jo frenonte integrimin europian që po troket te porta.

Lufta qoftë edhe sovraniste thjesht për pushtet në rastin e protestës do të ishte vetëm një korrupsion i ri!